Ísland aftur efst í alþjóðlegum samanburði
Annað árið í röð er Ísland efst í alþjóðlegum samanburði lífeyriskerfa. Íslenska lífeyriskerfið fær A í einkunn, hlaut 84,7 stig af 100 mögulegum en niðurstöður voru kynntar í dag. Heildareinkunn Íslands hækkar á milli ára. Holland og Danmörk koma fast á hæla okkar, einnig með A í einkunn, en alls tóku 44 ríki þátt í samanburðinum.
Lífeyrisvísitalan, sem ráðgjafafyrirtækið Mercen og samtökin CFA Institude standa að, metur heildarlífeyriskerfi mismunandi landa út frá þremur meginþáttum; sjálfbærni, nægjanleika og trausti. Ísland er í efsta sæti bæði í nægjanleika og sjálfbærni, sem vega þyngst í vísitölunni, en í sjöunda sæti þegar kemur að trausti til kerfisins.
Þeir þættir sem m.a. eru nefndir í skýrslunni sem styrkleikar íslenska lífeyriskerfisins:
- Tiltölulega ríflegur lífeyrir almannatrygginga.
- Skyldusparnaður alls launafólks með tiltölulega hárri iðgjaldaprósentu sem leiðir til þess að verulegar eignir eru lagðar til hliðar.
- Góðir stjórnarhættir og regluverk lífeyrissjóða.
Einnig er bent á hvernig hægt væri að hækka heildareinkunn Íslands enn frekar:
- Minnka skuldir heimila sem hluta af vergri landsframleiðslu.
- Huga betur að jöfnun lífeyrisréttinda við skilnað.
- Minnka skuldir ríkisins sem hlutfall af vergri landsframleiðslu.
Ítarefni:
Frétt á vef Stjórnarráðs Íslands
Frétt á vef Landssamtaka lífeyrissjóða
Mercer-CFA skýrsla ársins 2022
Samantekt Mercer á helstu atriðum skýrslunnar
