Stofnun
Stjórnir Lífeyrissjóðs Austurlands og Lífeyrissjóðs Norðurlands skrifuðu undir samrunasamning um
sameiningu þessara sjóða þann 15. nóvember 2006. Viðræður um sameiningu sjóðanna höfðu þá staðið með
hléum í u.þ.b. eitt ár. Á aukaársfundi Lífeyrissjóðs Norðurlands þann 15. desember 2006 voru
réttindaákvæði í samþykktum sjóðsins samræmd við réttindaákvæði í samþykktum
Lífeyrissjóðs Austurlans. Sameining sjóðanna var samþykkt á ársfundum þeirra, sem haldnir voru í Mývatnssveit þann 9. mars
2007. Þar var ákveðið að hinn sameinaði sjóður skyldi heita Stapi lífeyrissjóður. Fjármálaráðuneytið
staðfesti samþykktir hins sameinaða sjóðs þann 18. júní 2007.
Eldri sjóðir
Lífeyrissjóður Austurlands var stofnaður í samræmi við ákvæði kjarasamninga árið 1969 og hóf starfsemi ári
síðar. Skrifstofa sjóðsins var frá byrjun á Neskaupstað en starfsvæði sjóðsins náði yfir alla Austfirði.
Lífeyrissjóður Norðurlands tók til starfa 1. janúar 1993 og varð til með sameiningu sex lífeyrisjóða á Norðurlandi. Formlegur stofnfundur sjóðsins var haldinn á Blönduósi 1. desember 1992. Lífeyrissjóðirnir sem sameinuðust í Lífeyrissjóð Norðurlands voru:
- Lífeyrissjóðurinn Björg, Húsavík
- Lífeyrissjóðurinn Sameining, Akureyri
- Lífeyrissjóður trésmiða, Akureyri
- Lífeyrissjóður Iðju, Akureyri
- Lífeyrissjóður stéttarfélaga í Skagafirði, Sauðárkróki
- Lífeyrissjóður verkamanna á Hvammstanga
Auk ofantalinna lífeyrissjóða sameinaðist Blönduósdeild Lífeyrissjóðs verkalýðsfélaga á Norðurlandi vestra sjóðnum, en sá sjóður tók að öðru leyti ekki þátt í sameiningunni. Þann 1. janúar 2001 sameinuðust síðan Lífeyrissjóður verkalýðsfélaga á Norðurlandi vestra, Lífeyrissjóður KEA og Lífeyrissjóður Norðurlands.
Starfssvæði
Starfssvæði sjóðsins nær frá Hrútafirði í vestri að Skeiðarársandi í austri. Sjóðurinn nær þannig til
allra byggðakjarna á Norður- og Austurlandi. Sjóðfélagar eru almennt launafólk á þessu svæði, sem kemur úr ýmsum
atvinnugreinum, þ.m.t. sjávarútvegi, verslun, þjónustu, iðnaði ofl.
Starfsleyfi
Sjóðurinn starfar skv. starfsleyfi sem fjármálaráðherra veitti Stapa lífeyrissjóði
samkvæmt 52. grein laga nr. 129/1997. Jafnframt hefur fjármálaráðherra veitt sjóðnum heimild til að taka við
viðbótarlífeyrissparnaði í samræmi við ákvæði I og II kafla sömu laga. Stapi lífeyrissjóður varð til á grunni
Lífeyrissjóðs Norðurlands með sameiningu við Lífeyrissjóð Austurlands og hefur sömu kennitölu og lífeyrissjóðsnúmer
og Lífeyrissjóður Norðurlands hafði.
Aðildarfélög
Aðildarfélög sjóðsins geta verið stéttarfélög, starfsmannafélög og
samtök launagreiðenda. Aðildarfélaganna er getið í samþykktum sjóðsins.
Ársfundur
Ársfund sjóðsins skal haldinn fyrir lok júní ár hvert. Allir sjóðfélagar eiga rétt til setu á ársfundi með
málfrelsi og tillögurétti. Sérstakt fulltrúaráð fer með atkvæðisrétt á ársfundinum. Aðildarfélög
sjóðsins kjósa fulltrúa í fulltrúaráðið. Hjá stéttarfélögunum ræðst fjöldi fulltrúa af
stærð félags. Hjá launagreiðendum eiga fulltrúar frá 50 stærstu fyrirtækjanna sjálfkrafa rétt á setu í
fulltrúaráði, en auk þess hafa Samtök atvinnulífsins rétt til að tilnefna fulltrúa. Fulltrúar sem kjörnir eru af
stéttarfélögum og fara með helming atkvæða í fulltrúaráði á móti helmingi atkvæða fulltrúa launagreiðenda.
Heimilt er að kalla til aukafunda og gilda um þá fundi sömu reglur.
Stjórn
Stjórn sjóðsins er skipuð sex mönnum. Varamenn eru jafn margir. Stjórn sjóðsins tekur til beggja deilda hans. Stjórnin er kjörin á
ársfundi. Fulltrúar launamanna eru kosnir af fulltrúum stéttarfélaga á ársfundi en fulltrúar launagreiðenda eru tilnefndir af samtöku
atvinnulífsins. Kjörtímabil stjórnarmanna er 2 ár og er helmingur stjórnar kjörinn á hverjum ársfundi. Fulltrúar launagreiðenda
og launamanna skiptast árlega á um að fara með formennsku í stjórn.
